Sa para hynë dhe dolën nga Shqipëria dhe Kosova?

Pas Serbisë dhe Shqipërisë, për vlerën më të madhe të parave të hyra renditet Kosova, ku transfertat e hyra llogariten 759 milionë euro, ndërsa të dalat janë 35 milionë euro

Eurostat ka publikuar të dhënat mbi transfertat personale në vendet e Bashkimit Evropian dhe vendet kandidate për t’u anëtarësuar.

Në 2017-n transferatat që kanë hyrë në Shqipëri nga individët llogariten sipas Eurostat 872 milionë euro. Ndërsa transfertat që kanë dalë nga Shqipëria llogariten rreth 72 milionë euro.

Në këto transferta përfshihen edhe paratë që emigrantët dërgojnë në vendet e tyre të origjinës, ‘monitor’.

Ndër vendet e kandidate për t’u anëtarësuar vlerën më të madhe të transfertave të hyra e ka Serbia, ku gjatë 2017-s llogariten rreth 2.9 miliardë euro, ndërsa transfertat e dala llogariten sipas Eurostat rreth 201 milionë euro, përcjell albinfo.ch.

Pas Serbisë dhe Shqipërisë, për vlerën më të madhe të parave të hyra renditet Kosova, ku transfertat e hyra llogariten 759 milionë euro, ndërsa të dalat janë 35 milionë euro.

Në Turqi transfertat në 2017-n ishin 657 milionë euro. Vlerën më të ulët për sa i përket transfertave nga BE-ja e ka Maqedonia me 194 milionë euro të hyra dhe 18 milionë euro të dala.

Në total vendet jo anëtare të Bashkimit Evropian përgjigjen për 13% të transfertave të dala nga BE-ja.

Eurostat ka përllogaritur se rezidentët e BE-së kanë dërguar në vendet jo anëtare të Bashkimit Evropian gjatë 2017-s 32.7 miliardë euro, ndërsa transefertat e marra nga vendet jo anëtare të Bashkimit Evropian llogariten rreth 10.7 miliardë euro.

Pjesa më e madhe e transfertave personale përbëhen nga paratë që dërgojnë emigrantët në vendet e tyre të origjinës.

Nga të dhënat e Eurostat, transfertat ishin më të larta në vende si Franca me 10.6 miliardë euro, Spanja me 7.3 miliardë euro, Mbretëria e Bashkuar me 6.8 miliardë euro dhe Italia me 6.1 miliardë euro.

Në kontrast në vende të tjera të Evropës transfertat e hyra janë më të larta se paratë që kanë dalë jashtë vendit. Transfertat e hyra më të larta brenda BE-së ishin në Portugali me 3.6 miliardë euro, në Poloni me 3.1 miliardë euro, Rumani me 2.8 miliardë euro dhe Mbretëri e Bashkuar me 2.3 miliardë euro.

---