Rega ka kryer 160 operacione, duke përfshirë edhe Kosovën

Rega për misionet e shpëtimit ka kryer 160 operacione gjatë festave të Krishtlindjes (që nga e enjtja deri të dielën). Ajo ka intervenuar në rastet e aksidenteve, sëmundjeve apo për këshilla në Zvicër dhe jashtë vendit.

Foto Ilustrim

“Edhe pse nuk ka pasur borë, thirrjet e shumta e kanë kapluar Rega –në”, shpjegohet në komunikatën zyrtare. Albinfo.ch njofton se kjo gjë ka ndodhur sidomos  në  Oberlandin e  Bernese si  dhe në  Graubünden. Vetëm gjatë ditës  së shtunë afro pesëdhjetë misione janë realizuar.

Në lidhje me ndërhyrjet jashtë vendit, Rega bën të ditur se edhe Kosova ka qenë  e përfshirë në këto operacione. Albinfo.ch ka kontaktuar z. Rappaz, zëdhënësin për shtyp, për të njohur numrin e operacioneve të kryera në Kosovë. Gjatë festave të Krishtlindjes një numër i rëndësishëm i riatdhesimeve janë kryer sidomos në Ekuador, Maldive, Vietnam, Tajlandë, Oman dhe Kosovë. Sa i përket Kosovës, sipas z. Rappaz, Rega ka sjellë vetëm një person me avion mjekësor. Ai shpjegon se riatdhesimet me avion mjekësor kryhen në raste të veçanta dhe në bashkëpunim me trupin mjekësor në vend.

Cilat janë kushtet për të përfituar nga ky shërbim. Z. Rappaz thekson faktin se Rega nuk zëvendëson sigurimin shëndetësor dhe se nuk është një sigurim shëndetësor. Rega është një fondacion që përbush një mision publik, i cili funksionon falë donacioneve. 80% i buxhetit është i realizuar falë donacioneve dhe në shenjë falënderimi. Rega merr përsipër harxhimet, të cilat nuk mbulohen nga sigurimi shëndetësor. Sa për informatë, ju mund të lidheni me këtë shërbim dhe të përfitoni nga ai nëse bëni një donacion vjetor prej 30 frangash në vit individualisht, apo 70 franga për tërë familjen.