Qytetarët e Bettwil-it detyrohen të pranojnë qendrën e azilit

Me gjithë protestat e banorëve të fshatit Bettwil kundër hapjes së qendrës së azilit në fshatin e tyre, qeveria do ta hapë atë

Aksionet e protestës të banorëve të fshatit Bettwil të kantonit Aargau kundër hapjes së një qendre azili në fshatin e tyre, duket se do të mbeten të pafrytshme. Ministrja e drejtësisë Simonetta Sommaruga në marrëveshje me qeverinë e Kantonit të Aargaut ka marrë vendim që qendra e azilit megjithatë të hapet.

Për fillim do të jetë një strehë e përkohshme azilkërkuesish që do të qëndrojë hapur më së gjati gjashtë muaj.

Sommaruga duke iu drejtuar mediet zvicerane ka kërkuar nga banorët e Bettwilit që të pranojnë këtë vendim. Për shkak se numri i refugjatëve që po kërkojnë azil në Zvicër po shënon rritje të ndjeshme, qeveria është e detyruar të përshtatë vendbanime të përkohshme për azilkërkuesit.

Në fshatin dhe komunën Bettwil që ka gjithsej 560 banorë, duke filluar nga janari i vitit të ardhshëm në një ndërtesë të mbrojtjes civile do të strehohen plot 140 azilkërkues.

Qytetarët kanë treguar një reagim të ashpër dhe një mllef ndaj vendimit të autoriteteve për të sjellë në fshatin e tyre një numër kaq të madh të kërkuesve të azilit.

Në një mbledhje të mbajtur javën e kaluar ata kanë kundërshtuar me forcë përfaqësuesit e kantonit që kishin shkuar t`ua sqaronin vendimin për hapjen e qendrës.