Qeveritari i Lozanës merr vetëm një të tretën e rrogës që i takon

Pjesëtari i ri i ekzekutivit të qytetit të Lozanës, David Payot e ka arsyetuar këtë vendim të tij duke thënë se mandatet politike nuk duhet të shërbejnë si rast për pasurim

Pjesëtari më i ri i ekzekutivit të qytetit të Lozanës; David Payot, i cili vjen nga partia e ekstremit të majtë (Partia e Punës), ka bërë një hap simbolik dhe përmbajtjesor drejt transparencës. Ai ka publikuar lartësinë e të ardhurave të tij vjetore dhe, për më tepër, ka vendosur që të marrë vetëm diçka më shumë se një të tretën e këtyre të ardhurave, shkruan sda.ch

Payot e ka arsyetuar këtë vendim të tij duke thënë se mandatet politike nuk duhet të shërbejnë si rast për pasurim.

Si anëtar i qeverisë së Lozanës ai fiton një pagë bruto prej 247.947 frangash, transmeton albinfo.ch. Prej tyre ai ka vendosur që për vete të shfrytëzojë vetëm 98.398 franga që i bie një pagë mujore prej 7569 frangash ose aq sa ka fituar më parë si punëtor social. Por atë e ka llogaritur si normë pune 120 për qind, duke pasur parasysh se në vendin e ri të punës ka shumë terminë dhe më shumë punë.

Pjesa tjetër të pagës i jepet një këshilltareje politike ndërsa 28710 frangat që mbeten, ndahen për Partinë e Punës (PdA).

Duke dashur që të jetë në dispozicion të qytetarëve ai ka caktuar që për çdo mbrëmje në mes orës 18.30 dhe 19.30 të takojë ata në një bistro të qytetit dhe të shkëmbejë mendime, përcjell albinfo.ch