Qeveria: Taksa 100% nuk është kundër serbëve të Kosovës

Qeveria e Kosovës, nëpërmjet një deklarate për media ka thënë se është e vendosur që të vazhdojë taksën e vendosur prej 100% për mallrat të Serbisë dhe Bosnjës dhe nuk e ka në plan ta largojë atë pavarësish presioneve të vazhdueshme. Qeveria po ashtu ka thënë se kjo taksë nuk është e drejtuar ndaj serbëve të Kosovës, shkruan Albinfo.ch

“Pretendimet dhe deklaratat nga aktorë të ndryshëm, brenda dhe jashtë vendit, se masa prej 100% ndaj produkteve të importuara me origjinë nga Serbia dhe Bosnjë e Hercegovina u janë drejtuar qytetarëve serbë të Kosovës, janë të pavërteta, të paqëndrueshme dhe të papranueshme për të vërtetën dhe qëllimin e këtij vendimi të Qeverisë së Republikës së Kosovës. Ky vendim sovran i Kosovës vjen si rezultat i pengesave të vazhdueshme që Serbia po ia bën vendit tonë”, thuhet në deklaratën e ekzekutivit kosovar.

Ndërsa kryeministri i Kosovës, Ramush Haradinaj, ka ritheksuar se taksa nuk do të largohet pa njohjen e pavarësisë nga Serbia.