Qeveria e Kosovës nuk ndryshon qëndrim për gazin amerikan

Pretendohet se qymyri ia ka siguruar Kosovës rrymën më të lirë në rajon

Ministrja në detyrë e Ekonomisë, Artane Rizvanolli, ka reaguar ndaj debatit për gazin e lëngëzuar amerikan (LNG), duke mohuar pretendimet se Qeveria e Kosovës është kundër këtij projekti, përcjell albinfo.ch.

Përmes një videoje të publikuar në Facebook, Rizvanolli tha se është e pasaktë të thuhet se institucionet e Kosovës kanë refuzuar gazin e lëngëzuar nga Shtetet e Bashkuara të Amerikës.

Ajo theksoi se Kosova ndodhet në një pozitë më të favorshme se shumë vende të rajonit falë rezervave të mëdha të qymyrit, të cilat kanë bërë të mundur shmangien e varësisë nga gazi dhe mbajtjen e çmimit të energjisë elektrike në nivele më të ulëta.

Sipas Rizvanollit, qytetarët e vendeve fqinje paguajnë energjinë elektrike më shtrenjtë se qytetarët e Kosovës, ndërsa qëllimi i institucioneve mbetet ruajtja e çmimit sa më të ulët të energjisë për konsumatorët në vend.

Deklaratat e saj vijnë në mes të debatit publik lidhur me projektin për gazin e lëngëzuar amerikan dhe rolin e Kosovës në këtë iniciativë. /Albinfo.ch

---