Protestuesit kërkojnë hapje të kufijve për refugjatët

Sot në sheshin kryesor të Bernës, në Bundesplatz, janë tubuar rreth 500 veta për të protestuar kundër politikës së sotme të azilit në Zvicër. Ata kanë kërkuar një politikë azili “me dinjitet njerëzor” dhe kanë demonstruar për rrugë më të sigurta të ikjes së refugjatëve  dhe për kufij të hapur ndaj tyre.

Në mesin e demonstruesve ka pasur edhe shumë familje me fëmijë, shkruan srf.ch.

Manifestimi është organizuar nga dy gra. Ato kanë deklaruar se, si nëna, nuk kanë mundur të shikojnë me indiferencë se si në Evropë “po shkelen me këmbë të drejtat e njeriut”.

Dy gratë e përmendura, organizimin e kanë bërë para së gjithash përmes rrjetit social të facebook-ut. Manifestimi ka pasur po ashtu mbështetjen edhe të Amnesty-International dhe të iniciativës private “Schwizerchrüz”.