Profesoresha nga Kosova prezanton në Gjermani rezultatet e bashkëpunimit akademik

Zinaide Gruda nga Universiteti i Prishtinës ishte mysafire në Hochschule Bonn-Rhein-Sieg në kuadër të projektit ndërkombëtar ISEE

Profesoresha Zinaide Gruda nga Universiteti i Prishtinës ka zhvilluar një vizitë akademike në Hochschule Bonn-Rhein-Sieg në Gjermani, në kuadër të projektit ndërkombëtar ISEE.

Sipas njoftimit të universitetit gjerman, gjatë vizitës Gruda ka prezantuar rezultatet e bashkëpunimit të zhvilluar me studentët e Universitetit të Prishtinës, përcjell albinfo.ch.

Në fokus të prezantimit kanë qenë përvojat e studentëve kosovarë në bashkëpunimin me partnerët gjermanë, shkëmbimet ndërkulturore dhe sfidat që lidhen me komunikimin dhe punën e përbashkët në një mjedis ndërkombëtar.

Vizita është zhvilluar në kuadër të projektit ISEE, i cili synon forcimin e bashkëpunimit akademik dhe ndërkulturor mes institucioneve partnere.

Përmes këtij bashkëpunimi, studentët kanë mundësi të zhvillojnë kompetenca të reja, të shkëmbejnë përvoja dhe të krijojnë lidhje me kolegë nga vende të tjera.

Pjesëmarrja e profesoreshës nga Kosova në këtë program përfaqëson një tjetër shembull të bashkëpunimit akademik mes Kosovës dhe Gjermanisë.

 

---