Presidentja e Kosovës, Justina Shiroka Pula, ka vendosur ta kthejë në Kuvend për rishqyrtim Ligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.
Sipas njoftimit të Zyrës së Presidentes, vendimi është marrë pas pranimit të propozimit zyrtar të Grupit Parlamentar të Partisë Demokratike të Kosovës, me qëllim që Kuvendi ta rishqyrtojë ligjin, veçanërisht dispozitat që lidhen me juridiksionin dhe mandatin e Dhomave të Specializuara, si dhe garantimin e të drejtave kushtetuese të personave që po gjykohen në këto dhoma.
Në arsyetimin e vendimit, Presidentja ka vlerësuar sakrificën dhe kontributin e Ushtrisë Çlirimtare të Kosovës dhe të krerëve të saj në luftën për lirinë dhe pavarësinë e vendit. Ajo ka rikujtuar gjithashtu mbështetjen për Deklaratën e Kuvendit të Kosovës të 28 shtatorit 2026, lidhur me aktgjykimin e Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.
Presidentja ka ritheksuar kundërshtimin ndaj çdo përpjekjeje që, sipas saj, shtrembëron të vërtetën historike të Kosovës ose vë në dyshim karakterin çlirimtar të luftës.
Në njoftim bëhet e ditur se Presidentja ka zhvilluar dhe po vazhdon konsultimet me përfaqësues të institucioneve dhe subjekteve përkatëse shtetërore, me synimin e bashkërendimit të veprimeve institucionale dhe diplomatike për mbrojtjen dhe afirmimin e së vërtetës historike të Luftës Çlirimtare të Kosovës.
Këto konsultime, sipas Zyrës së Presidentes, synojnë gjithashtu mbrojtjen e të drejtave dhe interesave të krerëve të UÇK-së që po gjykohen në Dhomat e Specializuara.
