Porti i Durrësit, portë e hyrjes së mallrave me destinim Kosovën

Mallrat që kanë destinacion tregun e Kosovës kontrollohen dhe zhdoganohen nga zyrtarë doganorë të Kosovës të vendosur në këtë port

Hapja e pikës doganore të Kosovës në Portin e Durrësit të Shqipërisë, e bërë në janar të këtij viti, sipas autoriteteve në Prishtinë, ka ndikuar në rritjen e importit të mallrave përmes transportit detar që destinacion kanë Kosovën, si dhe ka lehtësuar procedurat doganore.

Bazuar në të dhënat e Doganës së Kosovës, që nga vendosja e pikës doganore në Portin e Durrësit janë proceduar rreth 4 mijë maune me destinacion terminalet doganore në Kosovë, shkruan Radio Evropa e Lirë.

Kjo pikë doganore në Portin e Durrësit ishte vendosur më 15 janar të këtij viti. Mallrat që kanë destinacion tregun e Kosovës kontrollohen dhe zhdoganohen nga zyrtarë doganorë të Kosovës të vendosur në këtë port.

Zëdhënësi i Doganës së Kosovë, Adriatik Stavileci, thotë për Radion Evropa e Lirë se për subjektet importuese kosovare, funksionimi i kësaj zyre doganore në Portin e Durrësit, ka shkurtuar koston e shpenzimeve të transportit, kohën si dhe procedurat burokratike tregtare.

“Aktualisht, në këtë zyre punojnë 6 zyrtarë doganorë. Brenda 11 muajve kjo zyre doganore e Kosovës në Portin e Durrësit ka proceduar 3.668 kërkesa apo maune transit me destinacion terminalet doganore në Kosovë. Për subjektet importuese kosovare funksionimi i kësaj zyre paraqet lehtësim, sepse agjencive doganore të autorizuara (nga këto kompani kosovare) që iu kryejnë shërbimet në zhdoganim të mallrave në Kosovë, u është dhënë mundësia që të kryejnë edhe procedurën e transitit nga Porti i Durrësit deri në destinacion, brenda Kosovës”, thotë Stavileci.

Më shumë se 60 për qind e mallrave të huaja që hyjnë në Kosovë, sipas të dhënave zyrtare, shfrytëzojnë transportin detar, konkretisht Portin e Durrësit dhe të Shëngjinit në Shqipëri. Shfrytëzimi i transportit detar për mallrat e importuara kishte filluar të shënojë rritje pas përfundimit të autostradës “Ibrahim Rugova”, e njohur edhe si ‘Rruga e Kombit’, e cila lidhë Kosovën me Shqipërinë dhe anasjelltas.

---