Politikani i SVP-UDC-së i gëzohet vdekjes së hajnit moldavian

Është hera e katërt që brenda pak muajve aktivistë dhe funksionarë të SVP-UDC-së bëjnë gafe me prapavijë kunder të huajve

Seppi Spiess, kryetar i degës për komunën e Schwyz-it të partisë SVP-UDC, ka shprehur hapur gëzimin e tij me vrasjen e një hajni moldavian veturash, të kryer nga një polic, gjatë ndjekjes.

Vrasja ka ndodhur ditë më parë në regjionin e Cyrihut. “Jam gëzuar vërtet shumë. Kështu është dashur të ndodhë, të ekzekutohet. Kështu pastaj kjo ngordhësirë nuk kushton asgjë. Por, ja, të huajt po qeshen me ne”. Kështu ka shkruar në rrjetin e facebook-ut funksionari partiak i SVP-së.

Shkrimi është zhdukur ndërkohë nga facebooku, por ai ishte regjistruar më parë.

Reagimet rreth këtij incidenti kanë qenë të ashpra. Kryetari i JUSO-s David Roth ka thënë me ketë rast: “Është e neveritshme. Këtu dikush po i gëzohet vdekjes së të tjerëve vetëm pse ata nuk janë zviceranë”.

Po kështu, i tronditur ka reaguar rreth këtij shkrimi edhe politologu Michael Hermann. “Kjo që ka ndodhur tash është madje për një shkallë më keq se twitteri me “natën e kristaleve” (kundër myslimanëve) të një aktivisti tjetër të SVP-së. Dikush duhej të nxirrte konsekuencat politike dhe profesionale nga rasti “i kristaleve”, ka thënë ai.

Është hera e katërt që brenda pak muajve aktivistë dhe funksionarë nivelesh të ndryshme të SVP-UDC-së bëjnë gafe të ngjashme, me prapavijë urrejtjeje ndaj të huajve. Secilën herë kreu i kësaj partie ka reaguar duke i cilësuar ato si “raste të izoluara e individuale”.

Ndërkaq vetë Spiess i pranon pasojat. “Edhe dorëheqja mund të jetë temë shqyrtimi. Por kjo nuk ka të bëjë me SVP-në”, ka thënë ai, duke theksuar se ka qenë një mendim i tij personal. Ai ka shtuar se është “pro të huajve por kundër kriminelëve”.

SVP-UDC e kantonit Schwyz e merr në mbrojtje bashkëpartiakun duke thënë se ai ka nam të mirë në rrethin ku jeton.

“Por ai e ka zbrazur në mënyrë të papërshtatshme mllefin e tij, ishte një gjuajtje e ngutshme”, është shprehur kryetari i partisë në nivel kantoni.