Politika zvicerane, e pandikuar nga zhvillimet në vendet fqinje

Zvicra mbetet një ishull stabiliteti, pavarësisht nga ndryshimet si ato në Francë (fitorja e Macron-it), Gjermani (ngritja e AFD-së ekstremiste) ose Austri, (fitorja e konservatorit Sebastian Kurz)

Në “barometrin politik” të publikuar sot nga transmetuesi publik i Zvicrës SRG dhe i realizuar nga Instituti për Hulumtimin e Opinionit “Sotomo” është “matur” edhe fuqia e partive politike të vendit. Kjo matje rezulton me ndryshime fare të vogla në krahasim me gjendjen e tetorit 2015, kur qenë zhvilluar zgjedhjet e fundit nacionale, raporton srf.ch.

Kështu, barometri thotë se sikur zgjedhjet nacionale të zhvilloheshin këtë të dielë, një ngritje, ndonëse të vogël, do ta shënonin partitë si: FDP, të Gjelbrit dhe të Gjelbrit  Liberalë (GLP), transmeton albinfo.ch. Ndërsa humbës, edhe pse me dallime minimale nga zgjedhjet e fundit, do të dilnin praktikisht të gjitha partitë tjera, pra: CVP/PDC, SVP/UDC, BDP dhe SP/PS. Por, humbje pak më të madhe, bazuar në këtë sondazh do të pësonte Partia Socialdemokrate (SP/PS) me minus 1.1 për qind.

87 për qind të të anketuarve kanë deklaruar se sërish do të bënin zgjedhje  e njëjtë, sikur në zgjedhjet e vitit 2015 për Parlamentin Nacional.

Kjo u jep dorë autorëve të sondazhit të konstatojnë se në Zvicër nuk kanë pasur të thuash fare ndikim zhvillimet dramatike në politikat e vendeve fqinje gjatë këtgyre pak viteve të fundit, përcjell albinfo.ch. Pra Zvicra ka vazhduar të mbetet një ishull stabiliteti, pavarësisht nga ndryshimet si ato në Francë (fitorja e Macron-it), Gjermani (ngritja e AFD-së ekstremiste) ose Austri, (fitorja e konservatorit Sebastian Kurz).