Policia arreston pesë zyrtarë të Ministrisë së Infrastrukturës

Foto ilustrim

Policia e Kosovës ka njoftuar se ka arrestuar pesë persona zyrtar në Ministrinë e Infrastrukturës së Kosovës.

Sipas njoftimit, pas një hetimi disamujor, Departamenti Special Anti-korrupsion (Task Forca Anti korrupsion) i Policisë së Kosovës ka realizuar një operacion policor me urdhëresë të Gjykatës Themelore në Prishtinë.

Operacioni ka rezultuar me arrestimin e pesë personave të dyshuar.

Arrestimi i pesë personave, zyrtarë pranë Ministrisë së Infrastrukturës është bërë mbi dyshimin e bazuar për përfshirje në veprat penale të keqpërdorimit të pozitës apo autoritetit zyrtar dhe marrje e ryshfetit.

Personat e dyshuar, të cilët janë arrestuar janë: P.N. viti i lindjes 1962, B.D. viti i lindjes 1974, B.K. viti i lindjes 1980, K.K. viti i lindjes 1957, M.B. viti i lindjes 1962.

Një person tjetër është në arrati, ka njoftuar policia, përcjell albinfo.ch.

Rasti ka të bëjë me dyshimin e bazuar se zyrtarët e lartshënuar në mënyrë të kundërligjshme kanë licencuar pyetës teorik (ekzaminer) për patentë shofer, përmes të së cilëve dyshohet se kanë ushtruar ndikimin e tyre në testet teorike për kandidatët për patentë shofer.

Gjatë këtij operacioni policor janë kryer bastisje në pesë lokacione, prej tyre tri zyra në Ministrin e Infrastrukturës, një  zyre në njësinë rajonale për patentë shofer në Prishtinë dhe një  zyre rajonale për patentë shofer në Gjakovë.

Policia e Kosovës gjatë kontrollit në këto lokacione ka sekuestruar edhe disa dëshmi relevante që ndërlidhen me rastin si dokumentacione, pajisje elektronike, telefona celular etj, dëshmi këto të cilat do të procedohen sipas procedurës ligjore, njofton Policia e Kosovës.

Të gjitha veprimet e mëtutjeshme policore do të ndërmerren në konsultim dhe koordinim me prokurorin kompetent të rastit.