Policët në Schaffhausen, vetëm me shtetësi zvicerane

Parlamenti ka votuar njëzëri kundër revidimit të ligjit mbi policinë dhe kundër punësimit të të huajve në polici

Në kantonin e Schaffhausenit, edhe në të ardhmen mund të bëhet polic vetëm ai që ka shtetësinë zvicerane. Kështu ka vendosur Parlamenti i Kantonit sot, duke iu përgjigjur negativisht qeverisë kantonale.

Kjo e fundit kishte propozuar që, në rast se nuk do të ketë mjaft kandidatë zviceranë për policë, të merreshin në konsideratë edhe personat me shtetësi të huaj.

Parlamenti ka votuar njëzëri kundër revidimit të ligjit mbi policinë. Në këtë kontekst edhe qeveria ka reviduar edhe një vendim të saj të mëhershëm që edhe të huajt dhe të huajat të lejohen në shërbimin policor, në rast nevoje.

Ky ndryshim mendimi është një fitore për SVP-UDC-në, e cila ishte shumë e vendosur kundër pranimit të të huajve në polici. Për të treguar vendosmërinë e saj, ajo kishte kërcënuar edhe me referendum popullor. Me pranimin në parlament me vota absolute (53 me 0) të ligjit të ri mbi policinë, del nga rendi i ditës çështja e referendumit.