Platformat gjermane të udhëtimeve korrigjojnë emrin e Prishtinës pas reagimeve

Journication dhe Aldi Reisen ndryshojnë përkatësinë e destinacionit në “Prishtina/Pristina”, pas reagimit të qytetarëve dhe ndërhyrjes diplomatike.

Dy nga platformat e mëdha gjermane të udhëtimeve, Journication dhe Aldi Reisen, kanë korrigjuar përkatësinë e destinacionit të Pristina, duke e ndryshuar nga “Priština” në formën e saktë “Prishtina” ose “Pristina”, shkruan albinfo.ch.

Lajmi është bërë i ditur nga Ambasada e Kosovës në Gjermani, duke theksuar se korrigjimi erdhi si rezultat i reagimeve të qytetarëve dhe angazhimit diplomatik.

Ambasadori i Kosovës në Gjermani, Faruk Ajeti, falënderoi qytetarët për reagimin dhe theksoi rëndësinë e adresimit të pasaktësive të tilla.

“Ky është një shembull tjetër i qartë se reagimi qytetar dhe diplomacia aktive japin rezultate konkrete”, u shpreh ai.

Ai gjithashtu u bëri thirrje qytetarëve që, në rast se hasin institucione apo kompani në Gjermani ku Republika e Kosovës apo qytetet e saj nuk paraqiten në mënyrë korrekte, të njoftojnë ambasadën përmes emailit zyrtar, duke bashkëngjitur dëshmitë përkatëse, në mënyrë që këto pasaktësi të adresohen dhe korrigjohen.

Sipas ambasadorit Ajeti, bashkëpunimi i qytetarëve dhe institucioneve mbetet thelbësor për të siguruar përfaqësim korrekt të Kosovës në arenën ndërkombëtare./Albinfo.ch

 

---