Petra Gössi, kryetare e re e FDP/PLR

“Për herë të parë që nga viti 1979 liberalët kanë rritur përqindjen e tyre në zgjedhje pikërisht gjatë kësaj periudhe”, ka thënë kryetari i deritashëm, Philipp Müller

Keystone

Sot në kuvendin zgjedhor të Partisë Liberale të Zvicrës (FDP/PLR), pas mbetjes vakant të postit të kryetarit (Philipp Müller pati dhënë dorëheqje muaj më parë), në krye të partisë është zgjedhur Petra Gössi.

Kryetarja e re është deputete nacionale nga kantoni Schwyz ndërsa në parti konsiderohet se i takon krahut të djathtë, njofton srf.ch. Këshilltarja 40 vjeçare në një ndërmarrje është zgjedhur në mënyrë unanime në këtë post si kandidatja e vetme.

Në kuvendin e mbajtur sot, kryetari i deritashëm Philipp Müller ka mbajtur një fjalë përshëndetëse, në të cilën veç tjerash ka përkujtuar mosbesimin që një pjesë e bashkëpartiakëve kishin shprehur ndaj zgjedhjes së tij katër vjet më parë.

Ndërkaq, ai e shikon me kënaqësi kohën që ka kaluar në këtë post. “Për herë të parë që nga viti 1979 liberalët kanë rritur përqindjen e tyre në zgjedhje pikërisht gjatë kësaj periudhe”, transmeton albinfo.ch. Në fakt FDP në zgjedhjet nacionale të mbajtura në tetorin e kaluar kishte shënuar një ngritje të shënueshme të votave. Ndërsa sondazhet më të reja e shohin atë madje si partinë më të madhe, e cila ka kaluar edhe SVP-në.

Sidoqoftë, fjalimi i kryetarit të deritashëm ishte më tepër një përmbledhje anekdotash e batutash se sa një fjalim që shërben si bazë për një tubim partiak.

Delegatët e kanë falënderuar ish kryetarin me humor dhe me duartrokitje.