Për 20 minuta kalohet tuneli më i gjatë në botë, 57 kilometra

Në testimin e shpejtësisë së trenave në tunelin e ri që është bërë sot, është arritur shpejtësia maksimale prej 200 kilometrash në orë, gjegjësisht është kaluar për 20 minuta tuneli i gjatë 57 km

(KEYSTONE/Laurent Gillieron)

Sot janë bërë testimet e shpejtësisë së trenave në tunelin e ri bazik të Gothardit, i cili me 57 kilometra, është më i gjati në botë. Siç bën të ditur Ndërmarrja Federale e Komunikacionit Hekurudhor (SBB), provat kanë shkuar plotësisht sipas planifikimit të bërë.

Gjithsej planifikohet që brenda një dite në këtë tunel të qarkullojnë 48 trena të udhëtarëve dhe 40 të mallrave

Testimi i shpejtësisë së trenave në tunelin e ri është bërë sot, rreth një muaj para lëshimit zyrtar në qarkullim të këtij tuneli, transmeton albinfo.ch.  Mësohet se është arritur shpejtësia maksimale prej 200 kilometrash në orë për trenat e udhëtarëve, gjegjësisht gjatësia e tunelit është kaluar për 20 minuta. Ndërsa shpejtësia për trenat e mallrave do të jetë maksimalisht 100 kilometra në orë, gjë që është provuar edhe në testimet e bëra sot.

Ngarkesa maksimale që lejohet për trenat e mallrave në drejtim të jugut është 1600 tonelata ndërsa në drejtim të veriut, 1400 tonelata.