Pengmarrje në një bankë në Gjermani, një person humb jetën dhe arrestohet autori i dyshuar

EPA/THOMAS BANNEYER

Pengmarrja në qytetin Regensburg të Gjermanisë ka marrë fund pas ndërhyrjes së policisë, e cila arrestoi autorin e dyshuar të ngjarjes, një 20-vjeçar gjerman. Operacioni u zhvillua në pjesën perëndimore të qytetit, ku forca të shumta policore, përfshirë njësi speciale të armatosura, rrethuan zonën pranë Stromerstraße, ku ndodhej banka.

Në vendngjarje mbërritën edhe ekipet e emergjencës, paramedikët dhe një helikopter policie, ndërsa zona u izolua për arsye sigurie.

Ngjarja nisi rreth orës 14:50, kur një person i armatosur me thikë sulmoi një punonjës brenda bankës. Viktima u transportua fillimisht në spital me plagë të rënda, por më vonë ndërroi jetë. Autoritetet kanë hapur hetim për akuzën e vrasjes.

Gjatë operacionit, dy persona u nxorën nga ndërtesa dhe u evakuuan. Në fazat e para të ndërhyrjes nuk ishte e qartë nëse brenda bankës kishte persona të tjerë përveç autorit. Policia dyshon se i dyshuari ka vepruar i vetëm dhe po shqyrton edhe mundësinë që ngjarja të ketë lidhje me një tentativë grabitjeje.

Para arrestimit, negociatorët e policisë u përpoqën të komunikonin me 20-vjeçarin për të zgjidhur situatën pa pasoja të tjera, por përpjekjet nuk patën sukses. Deri tani, motivet e sulmit mbeten të paqarta, ndërsa hetimet vazhdojnë për të zbardhur të gjitha rrethanat e ngjarjes.