Parlamenti zviceran vendosi: Swisscoy në Kosovë deri në fund të vitit 2023

Dhoma e Kantoneve në mbledhjen e saj të sotme ka bërë miratimin e këtij propozimi të bërë nga qeveria, me 33 vota pro, 6 kundër dhe dy abstenime

Të dyja dhomat e Parlementit të Zvicrës: Dhoma Nacionale dhe ajo e Kantoneve (Senati) kanë rënë dakord të zgjasin qëndrimin e personelit ushtarak zviceran në Kosovë të paktën deri në fund të vitit 2023.

Kjo për shkak se situata e sigurisë në Ballkan mbetet e tensionuar, shkruan sda.ch.

Po kështu, Senati, pas Dhomës Nacionale ka miratuar shtimin e numrit të kërkuar nga Këshilli Federal nga 165 deri në 195 pjesëtarë të ushtrisë.

Dhoma e Kantoneve në mbledhjen e saj të sotme ka bërë miratimin me 33 vota pro, 6 kundër dhe dy abstenime, transmeton albinfo.ch. Asnjë votë pro nuk ka ardhur nga grupet parlamentare të SVP dhe të Gjelbërve. Megjithatë, shumica është e mendimit se përdorimi i Swisscoy është në interes të Zvicrës.

Nëse situata në Ballkan përshkallëzohet, duhet të pritet një valë refugjatësh. “As Roma nuk është ndërtuar brenda një dite”, ka thënë Charles Juillard (CVP, Jura) në emër të shumicës. Situata në Kosovë është përkeqësuar përsëri, ashtu si dhe marrëdhëniet me Serbinë. Prandaj, NATO ka vendosur të mos zvogëlonte forcën e KFOR-it. Trupat ndërkombëtare janë ato që sigurojnë stabilitetin në vend.

Ashtu si në Dhomën Nacionale, një pakicë në Senat ka kërkuar gjithashtu që numri i pjesëtarëve të Swisscoy të mbahej në 165, sa është deri tani. Werner Salzmann (Bern, SVP.) e ka quajtur të panevojshme rritjen e kërkuar, përcjell albinfo.ch. Personeli mund të transferohej nga jugu në veri, ku situata është veçanërisht e brishtë, ka sugjeruar ai.

Zëdhënësi i shumicës Juillard i është referuar nevojës për oficer shtesë të stafit të shpallur nga KFOR. “Nëse hyjmë në aksiona atëherë këtë duhet ta bëjmë si duhet, në mënyrë që të funksionojë”, ka thënëDaniel Jositsch (Cyrih, SP.).

Ministrja e Mbrojtjes Viola Amherd është shprehur se situata e vështirë në Kosovë ka treguar boshllëqe në dispozitiv. Zvicra është lutur nga KFOR-i dhe specialistët vendas, për shërbime shtesë, veçanërisht shërbimin e gjenios. “Sa më pak të jetë e mundur dhe aq shumë sa të jetë e nevojshme” do të vazhdojë të jetë motoja për praninë e Swisscoy-t ka thënë ajo, përcjell albinfo.ch.
Parlamenti i ka thënë po gjithashtu nenit, sipas të cilit, në rast të një kërcënimi të shtuar kuota mund të rritet me 20 persona për një maksimum qëndrimi prej katër muajsh.

Për çdo punë logjistike dhe mirëmbajtjeje, kapaciteti gjithashtu mund të zgjerohet nga 50 persona deri në tetë muaj, transmeton albinfo.ch. Këshilli Federal tashmë e ka këtë mundësi sot. Neni është aprovuar katër herë në të kaluarën, ka thënë Amherd në Dhomën Nacionale. Deri më tani, Këshilli Federal e ka përdorur këtë opsion dy herë.

---