Pacolli zëvendëskryeministër dhe shef i diplomacisë

Brenda majit do të ketë riformatim të Qeverisë së Kosovës. Kjo do të ndodhë pas marrëveshje që është arritur dje midis kreut të PDK-së, Hashim Thaci, njëherësh kryeministër dhe kreut të AKR-së në dorëheqje, Behgjet Pacolli.

Riformatimi i Qeverisë do të prek Ministrinë e Punëve të Jashtme, që deri më tani I ka takuar PDK-së, ndërsa tash këtë dikaster do ta drejtojë partneri qeverisës, AKR-ja.

Sipas mediave, këtë post do të drejtojë Behgjet Pacolli, i cili njëkohësisht do të jetë edhe zëvendëskryeministër, i angazhuar për investime.

Zyrtarë të lartë të të dyja partive të koalicionit qeverisës kanë negociuar dje për hisen që do t’i takojë AKR-së në Qeveri, pas heqjes dorë të Pacollit nga kandidatura për president.

Po ashtu, në bazë të marrëveshjes së re midis Thaçit dhe Pacollit, AKR-ja, përpos Ministrisë së Punëve të Jashtme, do të drejtojë edhe një ministri shtesë, që do të thotë se do të drejtojë me pesë ministri.