Pacolli “shpërblehet” me postin e zëvendëskryeministrit të parë

Pacolli është i ngarkuar për të siguruar njohje të reja, si dhe për të sjellë investime të huaja

Kryeministri Hashim Thaçi ka marrë vendim që të emërojë Behgjet Pacollin zëvendëskryeministër të parë Qeverisë së Kosovës.

Në komunikatën e Qeverisë, bëhet e ditur se Pacolli do të jetë i ngarkuar i veçantë për marrëdhënie ndërkombëtare për të siguruar njohje të reja për shtetin e Kosovës, si dhe për të sjellë investime të huaja.

“Behgjet Pacolli emërohet zëvendëskryeministër i parë i Qeverisë së Republikës së Kosovës. Pacolli do të ketë detyrat dhe përgjegjësitë e përcaktuara për zëvendëskryeministrin e parë të Qeverisë së Republikës së Kosovës, në pajtim me legjislacionin në fuqi”, thuhet në vendimin e kryeministrit Thaçi.

Sipas komunikatës për media, vendimi I kryeministrit Thaçi hyn në fuqi në ditën e nënshkrimit.

Emërimi i Pacollit vjen dy ditë pasi ai hoqi dorë nga kandidimi për president të shtetit. Kandidatura e tij ishte nga partia e tij AKR-ja, e cila është pjesë e koalicionit qeverisës me PDK-në dhe minoritetet.

Pacolli ka thënë se dëshiron të kthehet si drejtues i AKR-së, pasi që pat dhënë dorëheqje më 23 shkurt nga posti i kryetarit të kësaj partie, ngase ishte zgjedhur president i shtetit, por atë e kontestoi Gjykata Kushtetuese për shkelje të Kushtetutës gjatë votimit në Kuvend, më 22 shkurt.

Ndërkohë, dje u zgjedh presidentja e re e shtetit, Atifete Jahjaga, në bazë të marrëveshjes të arritur midis Behgjet Pacollit, Hashim Thacit të PDK-së dhe opozitarit Isa Mustafa, kryetarit të LDK-së

Pacolli kishte hequr dorë për të qenë president, dhe më pas ambasadori amerikan në Kosovë, Christopher Dell e kishte propozuar Jahjagën për presidente.

Dhe, si duket, për këtë tërheqje, Pacolli është “shpërblyer” me postin e zëvendëskryeministrit të parë, të Qeverisë së kryeministrit Thaçi.