Opozita në Kosovë kërkon që dialogu të kthehet në pikën zero 

Dialogu me Serbinë duhet të kthehet në pikën zero, dhe bashkë me këtë duhet të shkohet në zgjedhje të reja për të fituar legjitimitetin politik, kanë thënë përfaqësuesit e opozitës dhe shoqërisë civile në tryezën e organizuar për kushtetutshmërinë dhe përgjegjësitë institucionale në procesin e dialogut me Serbinë. 

Shefi i Grupit Parlamentar të LDK-së, Avdullah Hoti, deklaroi se dialogu me Serbinë nuk duhet të udhëhiqet nga, siç i cilësoi ai, pseudo-ekipe, por nga institucionet legjitime. 

“Nuk negociohen kufijtë, Kosova duhet të ketë një platformë, por vetëm duke i pasur parimet kryesore të dialogut”, theksoi Hoti, përcjell albinfo.ch.

Për shefin e Grupit Parlamentar të VV-së, Glauk Konjufca, dialogu është përfshirë nga dy pazare, i pari, sipas tij, ka të bëjë me dorëzimin e kryeministrit Haradinaj karshi presidentit, Thaçi. E pazari i dytë, Konjufca, e konsideron përkrahjen e PSD-së, për këtë dialog me Serbinë.

 “Dialogu me Serbinë nuk duhet të vazhdojë në këtë mënyrë, se i mungon legjitimiteti politik, një proces të tillë Kosova duhet të kthejë në pikën zero. Pika zero e këtij procesi shkon dorë për dore me zgjedhjet e reja në Kosovë”, tha ai. 

Deputeti i LDK-së, Driton Selmanaj, bashkë me deputeten e VV-së, Albulena Haxhiu, përsëritën pretendimet e tyre se në cilat nene Ligji për Dialogun e shkel Kushtetutën e Kosovës.