Emrush Shkodra për listat e deputetëve për rajonin e Gjilanit

Shumica nga këta deputetë nuk do të kenë as fytyrë të dalin dhe të kërkojnë votat e qytetarëve, apo edhe nëse mbyllin sytë duke kërkuar takimet me qytetarë, besoj se këta nuk do të gjejnë rehati në shoqëri

Opinionisti mr. Emrush Shkodra mendon se listat për deputetë të subjekteve politike nga rajoni i Gjilanit duhet të ndryshojnë.

Bazuar në mendimet e qytetarëve të rajonit të Anamoravës, ata pohojnë se nuk janë të kënaqur me punën e Kuvendit të Kosovës, rrjedhimisht as me deputetët e Gjilanit të të gjitha subjekteve politike.

Në mënyrë specifike tregon se kjo legjislaturë nuk ka qenë në nivelin e pritur, e rrjedhimisht as në nivelin e duhur.

Prandaj, me të drejtë qytetarët besojnë dhe shpresojnë se këta deputetë që ishin pjesë e kësaj legjislature në këtë Kuvend nuk meritojnë të kenë edhe një mundësi të dytë si deputetë.

Thjesht, përtej kësaj, subjektet e caktuara politike do të duhej të mendonin mirë para së të përpilojnë listat duke nxjerrë emrat e deputetëve që do të gjendet përballë qytetarëve.

Shumica nga këta deputetë nuk do të kenë as fytyrë që të dalin dhe të kërkojnë votat e qytetarëve, apo edhe nëse mbyllin sytë, duke kërkuar takimet me qytetarë, besoj se këta nuk do të gjejnë rehati në shoqëri.

Mendohet se është një prej legjislaturave më të dobëta që kishte Kosova, është pikërisht kjo e tashmja, në të gjitha aspektet, e posaçërisht nga përgatitja superiore (intelektuale) e deputetëve.

Plotësisht, fitorja e një subjekti të caktuar politik do të varet nga lista e deputetëve që do t’ua prezantojnë qytetarëve!

Atëherë, cila është logjika nëse mendohet në fitore apo rritje të përqindjes në zgjedhje dhe të mos filtrohet lista për deputetë dhe njëkohësisht të përtërihet me individë dhe profesionistë të rinj.

 

 

---