OBSH: Alarm, virusi Zika

Organizata Botërore e Shëndetësisë ka shpallur gjendjen emergjente për shkak të përhapjes së shpejtë të virusit Zika, që transmetohet nga mushkonjat.
Virusi Zika është bërë rrezik për shëndetin publik në botë dhe për këtë arsye kjo është një përgjigje e domosdoshme dhe unike. OBSH ka vënë në të njëjtën kategori në aspektin e shqetësimit global virusin Zika, sikurse Ebolan.

Kjo u bë e ditur pas takimit të ekspertëve të OBSH-së që kishin diskutuar nëse përpjekjet ndërkombëtare për të luftuar epideminë duhet të forcohen urgjentisht.
Bisedimet ishin zhvilluar nga një komision prej 12 anëtarësh, kryesisht ekspertë të epidemiologjisë, shëndetit publik dhe sëmundjeve infektive nga Amerika Veriore dhe Jugore, Evropë, Azi dhe Afrikë.

Herën e fundit OBSH shpalli gjendje emergjente globale në vitin 2014 për shkak të shpërthimit të Ebolas. OBSH tha javën e kaluar se virusi Zika po përhapet me shpejtësi.