Nyon: 28 fëmijë shqiptarë festuan Ditën e Flamurit

Edhe në Nyon, komuniteti shqiptar shënoi  110-vjetorin e pavarësisë së shtetit shqiptar përmes një programi të ngjeshur, i cili u prezantua nga nxënësit e shkollës shqipe 'Naim Frashëri'.

Në të katër anët e Zvicrës u shënua, u kremtua, u vlerësua dhe u festua 110-vjetori i pavarësisë. Kësaj fryme iu bashkangjit edhe komuniteti shiptar i Nyonit, me një program mjaft prekës. Në qënder të Nyon-it u rikujtua historia e flamurit, u përmendën heronjtë e kombit dhe u recituan vargje për dashurinë e atdheut dhe të gjuhës shqipe. 28 fëmijë  që nga mosha 4-vjeçare deri në moshën 15-vjeçare vallëzuan dhe kënduan me gëzim dhe hare, duke nxitur rrahje të forta në zemrat e prindërve dhe mbarë publikut, i cili dukej i numërt dhe i etur për të zbuluar programin e përgatitur falë një bashkëpunimi të ngushtë mes Shoqatës Kulturore Shqiptare në Nyon dhe Rrethinë (SHKN) dhe shkollës shqipe “Naim Frashëri”. Salla ishte e mbushur me motra, vëllezër dhe prindër të fëmijëve në skenë, por edhe me disa përfaques zyrtarë të komunës së Nyon-it, miq zviceranë, si dhe përfaqësues të shoqatave të ndryshme. Që në fillimi, publiku e ngrohu atmosferën me brohoritje lumturie dhe duartrokje të pandalshme.

Ndërsa programi i përgatitur nga mësuesja Arbërie Vranovci u shpalos në skenë, duhet vlerësuar gjithë puna e bërë nga i gjithë stafi, i cili në heshtje dhe me përkushtim siguroi që fëmijët shqiptarë të Nyonit të vazhdonin të njihnin figurat heroike, rrënjët dhe zakonet e atdheut të tyre. . . Pra, një grup organizativ që përpiqej “me mish e me shpirt” të lidhë brezat e rinj me pasurinë e gjuhës shqipe dhe me kulturën e lashtësisë.

Falë mësueses Arbërie Vranovci dhe mësueses Doruntina Demelezi, të cilat janë mbështetur pa u lodhur nga menaxhmenti profesional i Shoqatës Kulturore Shqiptare në Nyonit dhe Rrethinë (Fadil Ademi, Ramadan Rrahmanin, Dafina Vllasin, Kosovë Avdiun, Mërgim Hasani, Fatima Bajrami), fëmijët vazhdojnë të mësojnë për origjinën dhe historinë e gjuhës shqipe. Falë përktushtimit të gjithë këtij stafi, fëmijët shiheshin duke pritur me padurim momentin kur të nxjerrin në pah kostumet e tyre tradicionale, kur do mund të recitojnë poezitë e heronjve të tyre. Ishte e qartë se nga sonte çdo fëmijë do të shkonte në shtëpi me bindjen se është bukur të mbashë gjallë tingujt e muzikës popullore dhe të flasësh shqip. Disa nga vogëlushët ishin mbresëlënës dhe të mbushur me njëfarë prestigji, njëfarë madhështie që i bëri shumë prindër krenarë.

Teksa fëmijët kërcenin dhe publiku i shoqëronte me fishkëllima përkrahjeje, Fadil Ademi dhe Kadri Mustafa, veprimtarë të njohur të kësaj komune, bisedonin për kohën kur çdo tubim i shqiptarëve ishte një betejë për të fituar të drejtën e lirisë. Sot Fadil Ademi dhe Kadri Mustafa vazhdojnë të jenë aktivë në promovimin e lirisë, por kësaj radhe duke promovuar gjuhën, historinë dhe traditat. Këta aktivistë të vjetër, që kanë një traditë 30-vjeçare dhe që kanë luajtur një rol të rëndësishëm për komunitetin e Nyon-it, vazhdojnë të udhëheqin brezat e rinj dhe t’i mbështesin në çdo organizim. Në mesin e tyre, shprehet për albinfo.ch edhe Ramadan Rrahmani, aktivist dhe këshilltar i Komunës së Nyonit, ai mendon se komunitet shqiptar i Nyon-it ka shumë potencial, por që duhet të mbështetet edhe më shumë për të fuqizuar shkollën shqipe.

Për brezat e rinj në këtë komunë, mësuesja Arbërie Vranovci pohon se numri i nxënësve po rritet dhe se prindërit janë gjithnjë e më të vetëdijshëm se mësimi i gjuhës amtare është kusht për suksesin shkollor të fëmijëve të tyre. Ajo pohon se ata që flasin mirë shqipen, shkojnë shumë më mirë në shkollë. Ekipi i shoqatës albinfo.ch ishte i pranishëm dhe përtej entuziasmit dhe kënaqësisë që pati, nuk mund të anashkalojë faktin se vitin e ardhshëm pret që në  këto tubime festive, e veçanërisht në Ditën e Flamurit, të përfitohet nga kjo një mundësi e mirë jo vetëm për të kërcyer e recituar, por edhe për të debatuar e folur për rëndësinë e gjuhës amtare në suksesin shkollor të fëmijës.

F O T O   G A L E R I