Nxënësit e klasës së nëntë në Ostermundigen nisin diplomën “Qyteti i rrënjëve të mia”

Në përfundim të semestrit, nxënësit vazhduan mësimin dhe aktivitetet edukative, ndërsa klasa e nëntë nisi punën për temën e diplomës “Qyteti i rrënjëve të mia”.

Shkolla shqipe në Ostermundigen, Bern, ka përcjellë një urim të veçantë për nxënësit me rastin e fillimit të pushimeve pranverore, duke theksuar se dita e fundit e mësimit u shoqërua edhe me aktivitete të rëndësishme edukative, përcjell albinfo.ch.

Sot, përveç mësimit të rregullt, leximit dhe shkrimit me nxënësit e nivelit të parë dhe të dytë, nxënëset e nivelit të tretë, përkatësisht klasa e nëntë, kanë nisur punën për temën e diplomës me titull “Qyteti i rrënjëve të mia”, një projekt që synon të forcojë lidhjen e tyre me origjinën dhe identitetin shqiptar.

Njëkohësisht, gjatë kësaj dite janë shpërndarë edhe librat e nivelit të tretë, të cilët do të shërbejnë për vazhdimin e mësimit plotësues në gjuhën shqipe.

Me këtë rast, drejtuesit e shkollës kanë shprehur falënderim të veçantë për Ambasadën e Kosovës në Bern dhe për zëvendësambasadoren Shukrije Ramadani, për mbështetjen e vazhdueshme dhe mundësimin e furnizimit me libra për mërgatën.

Shkolla shqipe në Ostermundigen ka njoftuar se mësimi do të vazhdojë pas pushimeve më 22.4.2026, duke uruar për të gjithë nxënësit pushime të mbara, të këndshme dhe të mbushura me energji./Albinfo.ch

---