Numri i personave që kanë kërkuar azil gjatë vitit 2014 në Gjermani është për 60 për qind më i madh se ai i një viti më parë. Në këtë mënyrë viti i kaluar me 202.834 kërkesa azili paraqet një rekord të viteve të fundit ndërsa është në vendin e tretë në listën e viteve me më shumë azilkërkues në Gjermani, përgjithësisht, ka deklaruar ministri i brendshëm i këtij vendi, Thomas de Maiziere.

Vetëm nga Siria gjatë vitit 2014 azil në Gjermani kanë kërkuar 41.000 persona.

Por, me numër veçanërisht të madh gjatë vitit azil kanë kërkuar shtetasit e vendeve të Ballkanit. Kështu, në mesin e 10 vendeve me më së shumti azilkërkues hyjnë këto pesë vende ballkanike: Serbia, Kosova, Maqedonia, Bosnjë e Hercegovina dhe Shqipëria. Nga këto pesë vende vijnë 30 për qind e të gjithë azilkërkuesve. Me klasifikimin e vendeve të Ballkanit si “vende të sigurta”, azilkërkuesit nga këto vende praktikisht nuk kanë kurrfarë gjasash për të fituar azilin.

Ministri gjerman ka thënë po ashtu se Gjermania, në krahasim me vendet tjera të BE-së ka numër dukshëm më të madh të azilkërkuesve. “Flukset e refugjatëve që vijnë duke u rritur dhe dhembja që bartin ata njerëz nuk na lejojnë të qëndrojmë indiferent”, ka shtuar ai. Por, ka arsyetuar ai, një politikë e përgjegjshme e migracionit nuk mund të injorojë faktin se azil po kërkojnë edhe shumë njerëz të cilët nuk janë të ndjekur në vendet prej nga vijnë. Ata nuk mund të njihen si refugjatë dhe për këtë arsye duhet ta lëshojnë vendin.