“Nuk ka të keqe që të rinjtë punojnë jashtë vendit, edhe vetë mora zanat në Zvicër”

Kryeministri Ramush Haradinaj ka thënë se nuk e kupton pse po bëhet tragjike shkuarja e të rinjve në vende të huaja për të punuar, raporton albinfo.ch.

Madje, ai ka thënë se edhe vetë dikur kishte punuar në Perëndim.

Këto deklarata Haradinaj i bëri në konferencën “Arsimi profesional dhe orientimi profesional janë politikë ekonomike”, të organizuar nga Fondacioni Friedrich Ebert, GIZ dhe Oda Ekonomike Gjermane-Kosovare.

Ai ka pranuar se edhe vetë ka marrë zanat në Zvicër në fushën e ndërtimtarisë, dhe me shaka ka thënë se po të mbesë pa punë, mund ta gjejë tjetrën.

“Për shembull, është thënë se po shkojnë të rinjtë tonë me punu, unë nuk e shoh (si dicka) të keqe, përkundrazi… Shkuarja në Gjermani për gjashtë ose nëntë muaj, edhe ky është aftësim. Unë kam mësuar zanat në Zvicër, edhe sot e kësaj dite di me ba izolim të kulmeve, di me vendosë dyer e dritare, di me punu në kulma, pra me mbetë pa punë, e gjej një punë. Nuk po e kuptoj pse duhet me marrë tragjike shkuarjen e të rinjve tanë për punë në Gjermani”, ka thënë Haradinaj, përcjell albinfo.ch.

Sipas tij, përvoja në këto vende të huaja është shkollë e jetës.