Nuk ka azil për dezertorët

Azilkërkuesit do të kenë të drejtë që kërkesën e tyre për azil ta bëjnë vetëm në kufijtë e Zvicrës dhe jo në ambasada

Këshilli i Kantoneve është shprehur në mbledhjen e djeshme për ashpërsimin e ligjit mbi azilin. Pika që synohet të ashpërsohet më shumë është shkurtimi i procedurës së azilit. Po kështu, azilkërkuesit do të kenë të drejtë që kërkesën e tyre për azil ta bëjnë vetëm në kufijtë e Zvicrës. Kërkimi i azilit në ambasadat e Zvicrës në botë, sipas këshillit në fjalë, duhet të ndalohet.

Ashpërsim duhet të ketë po ashtu në rastet e azilkërkuesve të ikur nga shërbimi ushtarak në vendet e tyre. Të gjithë ata që kërkesën e azilit e mbështesin në këtë bazë, do të refuzohen.

Revizioni i ligjit mbi azilin është miratuar me 14 vota pro, 16 të përmbajtura dhe me 4 kundër.

Po kështu, ministrja e drejtësisë, Simonetta Sommaruga,në përpjekje për ashpërsimin e procedurës së azilit ka shpallur tashmë propozimin që deri në fund të vitit 2012, të hapen të ashtuquajturat qendrat e procedurave, në nivel vendi. Procedura, sipas ministres, do të zgjasë më së gjati deri 120 ditë (nga rreth 1500 sa zgjat sot).