Njëvjetori i tragjedisë në stacionin e trenit të Novi Sadit mbledh turma të mëdha qytetarësh

Konsiderohet tubimi përkujtimor më i madh në historinë e Serbisë (Video)

Qindra mijëra njerëz kanë mbushur të shtunën rrugët e Novi Sadit, ku po mbahet tubim përkujtimor masiv me rastin e njëvjetorit të shembjes së një pjese të stacionit të trenit, ku humbën jetën 16 persona, përcjell albinfo.ch.

Qytetarë nga e gjithë Serbia kanë ardhur në Novi Sad për të nderuar viktimat e kësaj tragjedie. Shumë prej tyre kishin mbërritur që mbrëmë në qytet – disa në këmbë, e disa me biçikleta. Më të vendosurit ishin qytetarët e Novi Pazarit, të cilët kishin ecur për 16 ditë rresht për të arritur në këtë ngjarje.

Të pranishmit u mblodhën sot në orën 10:00 në 16 pika të ndryshme të qytetit, duke marshuar drejt stacionit të trenit, ku tubimi nisi në orën 11:52 – në të njëjtën kohë kur një vit më parë ndodhi shembja tragjike. Ky konsiderohet si tubimi përkujtimor më i madh në historinë e Serbisë.

Kjo ngjarje vitin e kaluar shkaktoi valë të madhe protestash në qytete të ndryshme të Serbisë kundër pushtetit, të cilin qytetarët e mbanin përgjegjës për tragjedinë. Gjatë protestave u raportua edhe për raste të shumta të dhunës policore, që nxitën edhe më shumë zemërimin publik.

https://x.com/Redakcija030946/status/1984568427739005095?ref_src=twsrc%5Etfw%7Ctwcamp%5Etweetembed%7Ctwterm%5E1984568427739005095%7Ctwgr%5E23c383a83ed2ea074404d74569bd1909df870b22%7Ctwcon%5Es1_&ref_url=https%3A%2F%2Fwww.koha.net%2Frajon%2Fturma-te-medha-njerezish-bllokojne-novi-sadin-ne-njevjetorin-e-tragjedise-se-stacionit-te-trenit&ct=rw-fb

---