Një afrikan në krye të bankës Credit Suisse

Tidjane Thiam, shtetas i Bregut të Fildishtë do të zëvendësojë në timon amerikanin Brady Dougan

Keystone

Banka e dytë më e madhe e Zvicrës Credit Suisse ka një shef të ri. Ai është një afrikan, gjegjësisht shtetasi i Bregut të Fildishtë, Tidjane Thiam. Eksperti i shquar i sigurimeve, i ardhur nga Britania e Madhe do të zëvendësojë në timon amerikanin Brady Dougan, që mbante këtë post nga viti 2007.
Thiam ka drejtuar me shumë sukses koncernin e madh britanik të sigurimeve “Prudential” ndërsa nuk ka përvojë në punë të drejtpërdrejtë me banka.
Ai do të fillojë ushtrimin e funksionit në muajin qershor, ndërsa të martën është prezantuar para medieve zvicerane. Ndryshe nga paraardhësi i tij Dougan, i cili ka komunikuar vetëm anglisht dhe në përgjithësi u ka ikur kontakteve me opinionin, Thiam ka folur para gazetarëve në gjuhën frënge, angleze dhe gjermane me ç`rast ka treguar një afërsi dhe emocionalitet.
Ai, në fjalën e tij ka thënë veç tjerash se Credit Suisse ka të gjitha parakushtet për të qenë e suksesshme edhe në të ardhmen. Ndërsa kryetari i Bordit të bankës, Urs Rohner ka deklaruar se strategjia e Credit Suisse do të mbetet e njëjtë edhe me shefin e ri.