Nga viti i ardhshëm, birra e Pejës edhe në Aldi

“Birra Peja” përveç në “Coop” dhe “Otos” do të plasohet edhe në të gjitha filialet e Aldit në Zvicër

Duke filluar nga 22 janari i vitit ardhshëm, edhe në marketet e Ald-it, në Zvicër do të dalë në shitje produkti shumë i kërkuar nga Kosova, “Birra Peja”.

« Birra Peja » ka nisur fillimisht distribuimin në shitoren numër dy në mesin e ndërmarrjeve në të mëdha tregtare të Zvicrës, « Coop ».

« Nga të gjitha birrat e Ballkanit, Aldi ka zgjedhur birrën e Pejës », thotë për albinfo.ch Rexhep Berisha, me qëndrim në Bazel, pronar i firmës R.B. Import& Export dhe i restorantit “Sängerstübli”, në po këtë qytet.

Ai thotë se gjithnjë e më shumë birra Peja po bëhet njëri prej produkteve më të kërkuara nga Ballkani.

Produktet nga Evropa Jugore dhe Lindore janë plasuar katër vjet më parë në filialet e Coop-it ndërsa më vonë edhe në Migros. Ndërsa sot produktet “exotike” nga Ballkani janë më të shiturat në Zvicër

 Sidomos të njohura janë ajvari , durum dhe farat të pjekura të kungullit. Po ashtu birra Peja nga Kosova  është në mesin e produkteve më të pëlqyera nga Ballkani . Kështu kanë thënë në një prononcim të mëhershëm zyrtarë  të Coop-it.

Janë 90 produkte të Ballkanit, duke përfshirë 30 nga Turqia që janë plasuar në tregun e Zvicrës. Ndërkohë raportohet për rritjen e vazhdueshme të shitjes së këtyre produkteve në Zvicër. Tregtarët me pakicë llogarisin të jenë më shumë se 700  mijë njerëz me rrënjë nga këto rajone në Zvicër .

“Rëndësia e rritjes së këtyre produkteve gjithashtu mund të ndikojë që edhe zviceranët t’i  fusin këto produkte në përdorim të përditshëm.”, thotë një zëdhënës i Migros-it .

« Birra e Pejës » prej disa vitesh mund të blihet në të ashtuquajturat “etnomarkete” (shitoret me mallra ballkanike) pastaj në Dener-Satelit dhe në Spar.