Nga e diela bileta e udhëtimit me tren 90 franga më shumë

Të dielën hyn po ashtu në fuqi orari i ri i SBB-CFF, ku shpeshtohen lidhjet ndërkombëtare

Nga e diela, më 11 dhjetor 2011, nëse nuk keni mundur ta bleni paraprakisht biletën për udhëtim me tren, ajo do t’ ju kushtojë së paku edhe 90 franga zvicerane më tepër, përveç çmimit të biletës. Deri më tani taksa për biletën në tren ka kushtuar 10 franga.

Veç kësaj, çmimi i shërbimeve të SBB-CFF është rritur. Për shembull, nxjerrja e biletave të trenit për udhëtime jashtë vendit në sportele si dhe përmes telefonit do të jetë 10 franga, kurse deri më tani ka qenë 5 franga.

Paralelisht me këto masa të reja të SBB-CFF, nesër po ashtu fillon orari i ri, ku do të shpeshtohet qarkullimi i trenave me destinacion ndërkombëtar, veçanërisht drejt Francës dhe Gjermanisë. Parashihet po ashtu shpeshtim i trenave brenda qyteteve zvicerane për orët e qarkullimit të dendur.