Në Tiranë do të mbahet Samiti i parë i Diasporës

Për të fuqizuar lidhjet e diasporës shqiptare kudo nëpër botë me vendin amë, në nëntor të këtij viti në Tiranë do të mbahet Samiti i parë i Diasporës

Nga 18 deri më 20 nëntor të këtij viti Qeveria Shqiptare organizon në Tiranë Samitin e parë të Diasporës Shqiptare.

Organizatorët pretendojnë që Samiti do të jetë një event madhor, ku Qeveria në Tiranë dhe aktorë të tjerë kombëtarë do të diskutojnë me përfaqësuesit e diasporës shqiptare nga çdo kënd i botës, në më shumë se 50 vende, për hapat konkretë që mund të hedhin për të forcuar lidhjet dhe bashkëpunimin mes tyre.

Kushdo që është i interesuar për këtë aktivitet mund të informohet përmes faqes online www.samitidiaspores.al, ku edhe mund të kontribuojë me sugjerimet e veta apo të regjistrohet për të marrë pjesë, shkruan albinfo.ch.

Mërgimtarëve iu është drejtuar nëpërmjet një videoje në rrjetet sociale kryeministri i Shqipërisë. Edi Rama.

„Ky takim historik është një sprovë që do na ndihmojë të diskutojmë dhe të gjejmë rrugët dhe mënyrat si të mund të vihemi më mirë në shërbim të gjithçkaje që na bashkon dhe ndajmë me njëri-tjetrin për të forcuar identitetin tonë kombëtar, për ta mbrojtur dhe promovuar trashëgiminë tonë të pasur dhe gjithçka që na bënë të jemi krenarë. Mirë se vini në Tiranë në këtë sprovë të parë”, tha kryeministri i Shqipërisë, Edi Rama.