Në dhjetë punëtorë të huaj, një është shqiptar

Statistikat e vitit 2011, në Itali flasin për mbi 2 milionë të punësuar të huaj që përbëjnë 9,8% të të gjithë të punësuarve në këtë vend

Në çdo katër të punësuar të huaj, një është rumun. Menjëherë pas rumunëve,  në vend të dytë renditen shqiptarët, me 232.531 të punësuar, apo e thënë ndryshe çdo dhjetë të punësuar të huaj një është shqiptar.

Por, nga ana tjetër numërohen 310 mijë të huaj të papunë, që përbëjnë sot 12,1% të popullsisë së huaj të aftë për punë. Ajo që vërehet në këtë aspekt është se ndër ata që mbesin pa punë për shkak të krizës janë emigrantë në një të tretën e rasteve. E thënë në shifra absolute kanë humbur punën gjatë vitit 2011 për shkak të krizës 148.431 emigrantë.

Janë këto disa nga të dhënat e studimit të fundit të Fondacionit Leone Moressa, transmeton portali Shqiptari i Italisë.

“Të dhënat tregojnë se kriza ka fryrë edhe radhët e të papunëve emigrantë. Pesha e emigrantëve mes të papunëve të rinj, me dallime nga një krahinë në tjetrën, është shumë e lartë, 35,7%. Të huajt që arrijnë t’i bëjnë ballë krizës, e bëjnë falë faktit që në disa profesione të huajt duken të stabilizuar, dhe të përqendruar qoftë sipas gjinisë, qoftë sipas kombësisë”, thotë studimi në fjalë.

Në studim vihet në dukje se të huajt kryejnë kryesisht punë të nivelit të ulët siç tregon fakti që 54% e burrave dhe 77,5% e grave mbulojnë vende pune që kërkojnë kualifikim të ulët.

Mes burrave punët më të përhapura janë ato që kanë të bëjnë me ndërtimin, ku  janë përqendruar 15,7% e meshkujve të huaj.

Ndjekin magazinierët e postierët (5,4%) dhe ata që punojnë në restorante (5,3%).

Në mesin e grave të huaja më e përhapura është puna pranë familjeve, për t’u kujdesur për të moshuarit dhe fëmijët, apo për të pastruar shtëpitë. Ndër zanatet e të huajave janë edhe ato në hotele e restorante ku përqendrohen 8,2% e grave të huaja.

Sipas studimit, çdo i katërti shqiptar punon në ndërtimtari. 27,5% janë zanatli e punëtorë të kualifikuar ndërtimi. 7,7% e shqiptarëve në Itali janë të punësuar në restorante e bare, 6% ofrojnë punë pranë familjeve (kryesisht gra) dhe 5% punojnë në bujqësi.