Natë me trazira në Cyrih

Ka protestuar organizata e ekstremit të majtë “Links Autonome”. Kërkesa e tyre ka qenë “Reclaime the street” (na e ktheni rrugën)

Në orët e vona të natës së mbrëmshme në dy qarqe të qytetit të Cyrihut kanë shpërthyer trazira të rënda që për pasojë kanë pasur zjarrvënie dhe shkatërrime të pronës private e publike.

Trazirat klanë ndodhur pasi që policia nuk e ka dhënë lejen për protesta që e kanë kërkuar më parë organizatorët. Bëhet fjalë për organizatën e ekstremit të majtë “Links Autonome”. Kërkesa e tyre e proklamuar edhe nëpër video të shfaqura në rrjete sociale ka qenë “Reclaime the street” (na e ktheni rrugën).

Policia e qytetit bën të ditur se rreth 200 protestues, shumica të maskuar, u kanë vënë zjarrin automjeteve dhe kontainerëve si dhe kanë thyer vitrinat prej xhami të lokaleve, raporton srf.ch. Për pasojë janë shkaktuar dëme prej qindra mijë frangash.

Policia ka angazhuar forca të mëdha për të shpërndarë protestuesit. Ajo ka vepruar kundër protestuesve të dhunshëm me gaz lotsjellës, me plumba gome dhe me vrushkuj uji. Për pasojë kanë pësuar lëndime shtatë policë ndërsa katë protestues janë arrestuar. Në njërën nga makinat e policisë është hedhur një objekt i zjarrtë por polici i ndodhur aty ka shpëtuar pa pasoja.