Moti i lig merr viktimën e parë

Një plakë 82 vjeçare është gjetur e vdekur në një përrua në kantonin e Bernës (Törrishaus, Köniz), pas reshjeve të fuqishme të shiut

Moti i lig që po mbretëron ditëve të fundit në pjesën më të madhe të Zvicrës, ka marrë edhe viktimën e parë. Një plakë 82 vjeçare është gjetur e vdekur në një përrua në kantonin e Bernës (Törrishaus, Köniz), pas reshjeve të fuqishme të shiut që kishin kapluar këtë regjion. Policia ende nuk ka mundur të japë hollësi lidhur me rrethanat e vdekjes së gruas në fjalë.

Ndër më të goditurat nga moti i lig në Kantonin e Bernës kanë qenë komunat Köniz, Laupen dhe Neuenegg. Qendra emergjente e Policisë së Kantonit të Bernës ka regjistruar gjithsej 130 lajmërime vetëm në mes të orës 19.45 të të shtunës dhe orës 10.00 të të dielës. Në shumicën e rasteve bëhej fjalë për shtëpi dhe bodrume të vërshuara.

Në Niederscherli janë evakuuar disa persona ndërsa njëri prej tyre është dashur të transportohej me Rega (helikopter).

Reshjet e mëdha kanë bllokuar edhe linjën hekurudhore Bernë-Freiburg. Një rrëshqitje dheu në mes të Thörishaus dhe Flamatt ka mbuluar shinat e hekurudhës. Kjo ka bërë që të bllokohet e tërë hekurudha, dhe të anulohen të gjithë trenat si në linjat lokale ashtu dhe ato nacionale e më gjerë, ka njoftuar SBB/CFF. Në vend të tyre janë vënë në dispozicion autobusët.

Si pasojë e shirave të mëdha në Kantonin e Bernës janë ndërprerë edhe disa linja tjera lokale të hekurudhës. Një pjesë e tyre nuk parashihet të lejohen për qarkullim pra të mërkurës së javës që vjen.