Mjekët e huaj, të mirëseardhur në Gjermani

Në shumë spitale gjermane mungojnë mjekët dhe personeli mjekësor. Por, jo çdo mjek i huaj lejohet të punojë menjëherë në Gjermani

Gjendja në spitalet gjermane është shumë e tensionuar, sepse në fushën e mjekësisë mungojnë mjekë dhe infermierë, prandaj në këtë sektor personeli i huaj është i mirëpritur.

“Medunited Academy“ është e specializuar për ndërmjetësimin e mjekëve të huaj dhe profesionistëve të tjerë për spitale dhe institucione sociale dhe ka ndërmjetësuar mjekë nga disa vende të Evropës Juglindore, p.sh. Shqipëria, Kosova, Rumania, Greqia, po ashtu  edhe nga Polonia, Rusia dhe nga Spanja.

Para se mjekët të vijnë në Gjermani për të punuar, ata duhet të kapërcejnë pengesën e gjuhës. Kusht është që ata të kenë të paktën nivelin e gjuhës B1, ideale është B2.

Falë ligjit të ri gjerman për njohjen e kualifikimeve të fituara jashtë shtetit që hyri në fuqi më 1 prill 2012, marrja e lejës për të punuar si mjek në Gjermani nuk lidhet më me shtetësinë e mjekut.

Megjithatë, mjekët nga vendet jashtë BE-së duhet t’i nënshtrohen një testi aftësie.

Instituti “Sprachwerkstatt” nga Paderborni ofron në bashkëpunim me partnerët e tij kurse gjermanishteje për mjekët e huaj në disa vende.

Pas përgatitjes në vendet nga vijnë, mjekët kanë mundësi të marrin pjesë në një kamp gjuhe, si në Marl, për të marë dorën e fundit për ato që kanë nevojë për punën në klinikë apo spital: bisedat dhe sqarimet për pacientët, fletët informuese, përshkrimi i analizave, apo si formulohen epikrizat.

Ndihmë mjekëve të huaj u jepet edhe për të përballuar sfidat me autoritetet e ndryshme në Gjermani: zyrat e të huajve, zyrat tatimore, apo komisionet për provimet mjekësore.

“Ne përpiqemi  të organizojmë jo vetëm kurset e gjuhës gjermane dhe t’i ndërmjetësojmë mjekët, por gjithashtu edhe t’u ndihmojmë pak për t’u orientuar në Gjermani”, thotë për DW Andreas Bernhardt nga Medunited Akademy.

Pas kursit të specializuar për mjekë “B2 Plus Med”, mjekët e rinj nga Rumania, Shqipëria dhe Rusia kanë gjetur punë në Gjermani.