albinfo.ch
E-Diaspora
Mësuesit mund të ndihmojnë projektin e regjistrimit të diasporës
Mërgimtarët, të cilët nuk i janë përgjigjur procesit të regjistrimit, këtë mund ta bëjnë drejtpërdrejt në plaformën elektronike ose gjatë muajve të verës kur shkojnë për pushime në Kosovë.
Ministria kosovare e Diasporës po bën fushatë, me anë të së cilës po informon mërgimtarët për rëndësinë e regjistrimit të tyre.
Për këtë qëllim një delegacion i Ministrisë së Diasporës nga Kosova, i kryesuar nga Shyhrete Kastrati, udhëheqëse e Departamentit për Qendrat Kulturore në Diasporë, Ramadan Mramori, udhëheqës i Divizionit për Regjistër të Diasporës dhe Anell Bajra, zyrtar i Arsimit Plotësues në Diasporë, kanë takuar të shtunën në Cyrih disa mësues të shkollës shqipe për t’i njoftuar për rrjedhën e deritanishme të këtij projekti.
Ramadan Mramori, udhëheqës i Divizionit për Regjistër të Diasporës, u ka shpjeguar mësuesve të mbledhur rëndësinë e regjistrimit, benefitet që mund t’i ketë mësimi plotësues i gjuhës shqipe me statistikat e mërgimtarëve.
“Ne e kemi parë shumë të arsyeshme për t‘i ftuar shoqatat, sepse ato janë dera e parë ku bashkatdhetarët kanë filluar aktivitetin e tyre. Në këtë rast me mësuesit e shkollës shqipe, ngase ata një herë në javë takohen me nxënësit dhe do ta kenë mundësinë për çdo javë t’i njoftojnë ata dhe prindërit e tyre me këtë proces”, ka thënë Mramori.
Një takim të njëjtë kishin zhvilluar edhe në Gjermani.
“Duke u bazuar në planin e veprimit për sivjet, ka mbetur vetëm Suedia dhe Beligjika për të prezantuar në këtë formë procesin e regjistrimit”, ka deklaruar Mramori dhe insiston se ky projekt ka qenë i suksesshëm deri tani dhe do të jetë deri në përfundim të tij.
Zyrtari nga Prishtina ka mohuar që të dhënat e regjistrit do të përdoren për të ngarkuar me tatime mërgimtarët, por vetëm për projektet studimore.
Procesi i deritanishëm i regjistrimit, sipas tij, ka treguar se më së shumti mërgimtarë numërojnë Gjilani, Ferizaji dhe Vitia.
Vetëm nga 15 qershori deri më 15 shtator të vitit të kaluar janë regjistruar mbi 250 mijë bashkatdhetarë.
Qëllimi i regjistrimit është evidencimi i numrit të saktë të pjesëtarëve të diasporës dhe mërgatës, shtrirja e tyre gjeografike, struktura demografike, shtetet ku jeton dhe vepron diaspora e mërgata, si dhe regjistrimi i shoqatave dhe formave të tjera të organizimit të tyre.
Pjesë e këtij regjistrimi është çdo person që ka vendbanim apo vendqëndrim jashtë Republikës së Kosovës, që ka lindur ose ka prejardhje nga Kosova.
Ndryshe, nëpër strategji e dokumente të ndryshme të autoriteteve të Kosovës, vlerësohet se një e treta e qytetarëve të Kosovës jetojnë jashtë territorit të saj.
Derisa, sipas disa të dhënave të Agjencisë së Statistikave të Kosovës, thuhet se janë rreth 700 mijë kosovarë që jetojnë në vende të ndryshme të botës, shumica prej tyre në Evropën Perëndimore dhe në Shtetet e Bashkuara të Amerikës.
Këtë vit do të përfundojë regjistrimi aktiv i bashkatdhetarëve, ndërsa do të vazhdojë në platformën elektronike, ndërsa rezultatet do të publikohen në mars të 2017-ës.
Të ngjashme
Të tjera nga E-Diaspora
E-Diaspora
-
Kryeministri i Kosovës sërish me thirrje për qytetarët e Kosovës dhe ata në diasporë që të regjistrohen Derisa procesi i regjistrimit të popullsisë në Kosovë ka hyrë në javën e fundit, kryeministri Albin...
-
ASK: Mbi 1.4 milionë qytetarë të regjistruar, mbi 400 mijë nga diaspora
-
Rama njofton për programin e veçantë për emigrantët që duan të investojnë në Shqipëri
-
400 mijë të regjistruar përmes platformës e-diaspora
-
Bizneset ekspozojnë produktet e tyre në “Panairi Lugina” në Zvicër
Jeta në Austri
-
Si po e bën Austria më të lehtë imigrimin e punonjësve të huaj shëndetësorë? Plakja e popullsisë së Austrisë dhe mungesa e punonjësve të kujdesit shëndetësor janë ndër sfidat kryesore...
-
A mund të blejnë të huajt prona në Austri?
-
A mund të marr nënshtetësinë austriake dhe të lëviz menjëherë jashtë vendit?
-
Kandidatja austriake për eurodeputete viziton Zubin Potokun
-
Kandidati për eurodeputet, Lukas Mandl vizitoi meshën shqipe në Vjenë