Merkel shpall “Strategjinë e daljes”: Shkollat hapen më 4 maj

Sipas kancelares Merkel, kufizimet e kontaktit në hapësira publike me një distancë minimale prej 1.5 metrash do të vazhdojnë të mbeten në fuqi për momentin

Gjermania ka vendosur zbutjen e një pjese të masave të shpallura më parë për luftimin  e koronavirusit, njofton Agjencia e lajmeve DPA.

Kancelarja Angela Merkel e ka njoftuar këtë vendim në një paraqitje të drejtpërdrejtë para mediave në orët e para të mbrëmjes së sotme.

Kjo paraqitje ishte paralajmëruar gjatë ditës së sotme si prezantim i strategjisë së daljes graduale të Gjermanisë nga kriza e koronavirusit.

Nga e hëna që vjen, (20 prill) dyqanet që kanë sipërfaqe shitjeje deri në 800 metra katrorë do të rihapen, duke plotësuar disa kushte, transmeton albinfo.ch. Ndërsa floktarët do të hapin lokalet e tyre, duke filluar nga 4 maji.

Sipas kancelares Merkel, kufizimet e kontaktit në hapësira publike me një distancë minimale prej 1.5 metrash do të vazhdojnë të mbeten në fuqi për momentin.

Por, nuk ka vendim për detyrim të bartjes së maskës mbrojtëse në dyqane dhe transport publik, ka thënë Merkel, përcjell albinfo.ch. Ka vetëm një rekomandim për një gjë të tillë, ka thënë ajo.

Nga 4 maji, shkollat gradualisht do të rihapen. Megjithatë, aktivitetet e mëdha publike si ato kulturore, sportive e fetare, nuk do të lejohen deri në fund të gushtit.

---