Me referendum kundër angazhimit të detektivëve socialë

Si argument kryesor për iniciativën e tyre, iniciuesit paraqesin kërcënimin e sferës private që vjen me instalimin e detektivëve të përmendur

Vendimi i marrë nga Parlamenti i Zvicrës për lejimin e sërishëm angazhimit të detektivëve kundër të dyshuarve për abuzim me ndihmat sociale, ishte kundërshtuar fuqishëm nga partitë e majta të Zvicrës. Por as ato nuk kishin pasur guximin të inicionin një referendum kundër këtij vendimi, aq të pasigurta ishin në suksesin e një nisme të tillë, shkruajnë mediet zvicerane. Por atë që nuk e bënë partitë dhe shoqatat, po e bëjnë një numër inidvidësh të zhgënjyer nga vendimi i përmendur, të lidhur përmes rrjeteve sociale.

Shkrimtarja e njohur Sibyle Berg, eksperti i fushatave Daniel Graf dhe disa të tjerë, në platformën wecollect kanë kërkuar fillimisht nënshkrimet e 5000 mbështetësve, transmeton albinfo.ch. Dhe, suksesi nuk ka vonuar. Vetëm brenda natës në mes të të mërkurës dhe të enjtes mbështetjen e tyre e kanë ofruar më shumë se njëmijë kundërshtarë të angazhimit të detektivëve socialë. Nga këta pritet të grumbullohen 50 mijë nënshkrime sa nevojiten për iniciimin e një iniciative federale për referendum.

Si argument kryesor për iniciativën e tyre, iniciuesit paraqesin kërcënimin e sferës private që vjen me instalimin e detektivëve të përmendur. Kjo për faktin se detektivët në fjalë, në rast të dyshimit për abuzim me pensionet e invaliditetit ose të ndihmave sociale do të mund të përdorin metoda që sot policisë nuk i lejohen as për rastte e dyshimit për terrorizëm.

Nga ana tjetër, sipas iniciatorëve, edhe kursimet që do të realizoheshin janë qesharake në krahasim me humbjet që peëson shteti nga mashtruesit e tpasur të taksave, transmeton albinfo.ch. Për secilin rast të zbuluar të abuzimit me ndihmat sociale duhen paguar pagat e detektivëve dhe këtu vijnë pastaj edhe shpenzimet procedurale dhe burokratike.

Siç është shkruar tashmë, sigurimet e Zvicrës (sociale, invalidore etj.) për të zbuluar mashtruesit e dyshuar, me ligjin e rishikuar do të kenë të drejtë të realizojnë përgjime përmes mjeteve teknike si GPS ose dronë, me ç`rast do të mund të filmojnë edhe në kopshte ose balkone të të dyshuarve.