Me miratimin e buxhetit, rriten edhe pagat

Kryetari i BSPK-së, Haxhi Arifi tërheq vërejtjen se në rast të mos realizimit të premtimeve, BSPK do të ndërmarrë hapa tjerë

“Gjatë takimit me zyrtarë qeveritarë kemi marrë premtimin se marrëveshja për ngritjen e pagave do të respektohet si dhe se pagesa për muajin janar dhe shkurt do të bëhet në mënyrë retroaktive”. Kështu ka thënë kryetari i BSPK-së, Haxhi Arifi, duke shtuar gjithashtu se nuk duhet të nënshkruhen listat me paga të vjetra.

Ai ka theksuar më tej se Qeveria ka bërë të ditur se ngritja e pagave do të bëhet pas miratimit të ligjit për buxhetin.

Sipas kësaj del se ngritje pagash nuk do të ketë as për muajin shkurt. Arifi tërheq vërejtjen se në rast të mos realizimit të premtimeve, BSPK do të ndërmarrë hapa tjerë. “Ne do t’i shfrytëzojmë sipas statutit tonë edhe hapat tjerë”.

Arifi ka rikujtuar se nuk ka pasur marrëveshje me Qeverinë për afatin se kur duhet të merren pagat me ngritje.