Mashtroi se ishte me aftësi të kufizuara, përfitoi 137 mijë euro

Policia italiane ka arrestuar një 55 vjeçar që kishte arritur që përmes mashtrimit si njeri me aftësi të kufizuara, të përfitonte 137 mijë euro.

Policia deklaroi se mashtrimet e tij kishin filluar që në 2007 kur ai organizoi një aksident rrugor të rremë, së bashku me një bashkëpunëtor.

Në ngjarje është përfshirë dhe një oficer policie i cili i siguroi atij edhe karrigen me rrota, të cilën polici e kish përdorur pas një dëmtimi të marrë gjatë një incidenti me armë.

“Personi në fjalë përdori shumë identitete të rreme gjatë këtyre viteve dhe në një moment arriti edhe t’i injektonte vetes ‘Lidocaine’ (një anestezik që përdoret për mpirje lokale) që të simulonte kështu një paralizë të këmbës së tij”, thonë burime pranë policisë, transmeton ‘Scan’.

Dëshmi të shumta u mblodhën, nga një ish infermiere si dhe fotografi dhe video që tregojnë teksa ai ecën vetë, për të demaskuar personin në fjalë, përcjell albinfo.ch.

Ai u arrestua në aeroportin e Firences teksa po kthehej nga pushimet e tija në Togo.