Luzerni shpërndan fletushka me rregulla të mirësjelljes për azilkërkuesit

Një javë para fillimit të karnavaleve, kantoni Lucern ka shpërndarë në qendrat e azilit fletushka me rregullat se si duhet të sillen azilkërkuesit. Kjo vjen nga frika që është shkaktuar nga sulmet e fundit mbi gratë në Gjermani.

Fletëpalosja vjen nga shërbimet shëndetësore dhe sociale të Kantonit të Lucernit. Fletushka  përmban 20 fotografi me tekste të shkurtra përcjellëse të rregullave themelore për të jetuar së bashku në Zvicër. Këto fletushka janë dorëzuar në këto ditë në qendrat kantonale të azilit.

Bëhet fjalë për sundimin e ligjit, barazinë midis burrave dhe grave, të drejtat e fëmijëve dhe mbi standardet në jetën publike. Një prej rregullave është se dhuna seksuale është e ndaluar. Edhe aktet seksuale mes të rriturve dhe fëmijëve nën moshën 16 vjeç janë të dënueshme.

Fletushkat janë fillimisht në dispozicion vetëm në gjermanisht, por do të përkthehen edhe në gjuhë të tjera.