Lu porosit: Kapni peshqit e mëdhenj

Donald Lu tha gjithashtu se kokat e krimit duhet të kenë frikë pasi drejtësia për ta po vjen

Ambasadori amerikan në largim në Tiranë, Donald Lu hodhi kritika të forta në drejtim të autoritetet për mos arrestimin e Klement Balilit, duke theksuar se autoritetet “nuk kanë pasur aftësinë ose vullnetin” për ta arrestuar.

Lu tha gjithashtu se kokat e krimit duhet të kenë frikë pasi drejtësia për ta po vjen.

“Së dyti, Shqipëria mbështeti arrestimin e Met Kananit në Turqi. Banda e tij u arrestua këtu në Shqipëri. Së treti, doganat shqiptare zbuluan 630 kg kokainë kolumbiane, që çoi në arrestimin e trafikantit të narkotikëve, Arbën Çekaj në Gjermani.

Disa prej anëtarëve të bandës së tij janë arrestuar dhe shpresojmë që ditët e ardhshme të arrestohen të tjerë. Së katërti, kryebashkiaku Fran Frrokaj dhe ish-kryebashkiaku Elvis Roshi, po ndiqen penalisht. Emiljano Shullazi dhe Lul Berisha po gjykohen në Gjykatë”, është shprehur Lu.

Ai shpreson se edhe peshqit e mëdhenj do të gjenden prapa grilave, përcjell albinfo.ch.

“Hetimi penal kundër ish-ministrit të Brendshëm, Saimir Tahiri dhe ish-kryeprokurorit të Përgjithshëm Adriatik Llalla vazhdon. Ka shumë aktivitet për një periudhë të shkurtër kohe, por duam të shohim rezultate konkrete.

Duam që peshqit e mëdhenj të ndiqen penalisht, të dënohen dhe futen në burg, ky do të ishte sukses.

Dua të theksoj një dështim të qeverisë, prokurorisë dhe të policisë, dështimi për të arrestuar Klement Balilin. Dy vite më parë, DEA punoi me policinë greke për arrestimin e disa anëtarëve të bandës së Balilit në Greqi. Më pas, gjykata greke dënuan Balilin me një dënim të përjetshëm plus 15 vjet heqje lirie. Balili është një bos i fuqishëm i krimit të organizuar me lidhje politike”, transmeton “oranews”.

“Kokat e krimit duhet të kenë frikë, drejtësia për ta po vjen”, përfundoi Donald Lu.