Libani shpall ditë zie pas shpërthimit, të paktën 10 persona humbën jetën

Kryeministri libanez, Hassan Diab shpalli se e mërkura, 5 gusht do të jetë një ditë zie kombëtare për viktimat e shpërthimit të madh në portin e Bejrutit.

Të paktën 10 persona kanë humbur jetën dhe qindra tjerë janë lënduar nga shpërthimet e fuqishme, që kanë ndodhur sot në qendrën e qytetit të Bejrutit në Liban.

Raportet e televizionit lokal cituan burime spitalore të thoshin se rreth 400 deri në 500 persona janë plagosur.

Shpërthimet kanë ndodhur në portin e qytetit ku gjenden magazinat brenda të cilave kishte eksplozivë, ka bërë të ditur agjencia shtetërore e lajmeve në Liban, NNA.

Presidenti libanez, Michel Aoun ka thirrur për një takim urgjent të Këshillit Kombëtar të Mbrojtjes.