Vetëvendosje ndryshon statutin, Kurti do ta mbajë postin e tanishëm

Të dielën e fundit të vitit 2019, Lëvizja Vetëvendosje mblodhi Këshillin e Përgjithshëm të partisë

Lëvizja Vetëvendosje ka ndryshuar statutin e partisë. Para se të marrë postin e Kryeministrit, Kurti siguron edhe postin e kryetari të partisë.

Të dielën e fundit të vitit 2019, Lëvizja Vetëvendosje mblodhi  Këshillin e Përgjithshëm të partisë. Brenda kësaj mbledhje për orë të tëra janë zhvilluar edhe punime, që kishin të bënin me plotësim-ndryshimin e disa pikave të Statutit të Lëvizjes Vetëvendosje.

Fokusi ishte tek pika 73.3 e statutit, që parashihet që kryetari i partisë nuk mund të mbajë dy pozita.

“Kryetari i Lëvizjes VETËVENDOSJE zgjidhet kryeministër, jep dorëheqje nga pozicioni i Kryetarit të Lëvizjes VETËVENDOSJE!”

Ndërkohë,  siç merr vesh T7 nga burimet e saj brenda Këshillit të Përgjithshëm, të gjithë njëzëri janë pajtuar që kjo pikë të ndryshohet dhe rrjedhimisht Albin Kurti edhe nëse bëhet kryeministër, do të vazhdojë të jetë kryetar i partisë.

E ky vendim i KP të LVV-së po shihet si jodemokratik për një parti që ka promovuar demokracinë e saj të brendshme.

Madje, sipas Bekim Kabashit, ky vendim i ri i VV-së këtë parti nuk e dallon asgjë nga partitë e tjera në Kosovë.

T7 ka kërkuar përgjigje zyrtare nga VV për ndryshimet eventuale brenda statutit, por nga kjo parti kanë parapëlqyer të mos flasin për këtë çështje.

---