Kuvendi i Shqipërisë do nxjerrë rezolutë për agresionin e Serbisë në Kosovë

Grupet parlamentare të Partisë Socialiste dhe Partisë Demokratike do të ulen së bashku për të punuar në dy rezoluta për Kosovën.

Kryetarja socialiste e komisionit parlamentar për punët e jashtme dhe nënkryetari demokrat pritet të ulen bashkë me synim e çuarjes në parlament të një rezolute të vetme.

“Nuk duhet të përbënte lajm fare por është lajm i mirë gjithsesi që  ne kemi arritur  në një konsensus që të bashkojmë të dy qëndrimet tona në rezoluta që kemi paraqitur të dalim me një rezolutë të përbashkët për ngjarjet e fundit në veri të Kosovës”, u shpreh kryetari i Grupit Parlamentar të PS-së, Bledi Çuçi, shkruan Top Channel.

Parlamenti do të mbajë seancë ku do të diskutohet e miratohet një rezolutë për situatën në Kosovë.

Draft rezoluta e dorëzuar në Kuvend nga Grupi Parlamentar i PS-së, reflekton qëndrimet e deritanishme publike mbajtur nga kryeministri Edi Rama.

Kjo rezolutë me 13 pika kërkon “Dënimin e sulmit të armatosur terrorist në veri të Republikës së Kosovës dhe mbështetjen e përpjekjeve për garantimin e sigurisë dhe paqes në vend e në rajon”, përcjell albinfo.ch.

“Përgëzon institucionet e sigurisë së Republikës së Kosovës për maturinë dhe profesionalizmin e tyre si dhe vlerëson forcat e EULEX-it dhe KFOR-it për gatishmërinë, bashkëpunimin dhe angazhimin në aksionin për zmbrapsjen e sulmeve kriminale të njësive terroriste dhe neutralizimin e përpjekjeve për përshkallëzimin e konfliktit në veriun e Kosovës dhe destabilizimin e vendit.  Kërkon nga Serbia që të heqë dorë nga qëndrimet dhe veprimet armiqësore e luftënxitëse ndaj Republikës së Kosovës.  Të hapë një hetim serioz e transparent ndaj tërë organizatorëve dhe shkaktarëve të operacioneve ushtarake terroriste ndaj Republikës së Kosovës dhe të dorëzojë kriminelët”, thuhet në draft-rezolutë.

“Është rënë dakord me propozimin tonë që të kemi një seancë të posaçme dedikuar vetëm Kosovës më datën 12 Tetor pra të enjten e javës që vjen dhe koha e debatit të jetë rreth 5 orë”, tha Gazment Bardhi, shkruan Top Channel.