Kurti kujton Afrim Bunjakun: Të gjithë përgjegjësit e Banjskës do të përballen me drejtësinë

Në trevjetorin e sulmit në Banjskë, kryeministri i Kosovës ka kujtuar policin Afrim Bunjaku dhe ka thënë se shteti nuk do të heqë dorë nga kërkimi i përgjegjësve.

Kryeministri i Kosovës, Albin Kurti, ka kujtuar rreshterin e Policisë së Kosovës, Afrim Bunjaku, në trevjetorin e sulmit të armatosur në Banjskë, ku ai u vra në krye të detyrës, raporton albinfo.ch. Kurti ka deklaruar se shteti i Kosovës do të vazhdojë përpjekjet për vendosjen e drejtësisë ndaj të gjithë personave përgjegjës për sulmin, përcjell albinfo.ch.

Në një postim, Kurti ka thënë se Bunjaku ra duke mbrojtur sovranitetin dhe tërësinë territoriale të Kosovës. Ai ka deklaruar gjithashtu se grupi i armatosur kishte, sipas tij, synim konfliktin e armatosur dhe aneksimin e veriut të Kosovës.

“Grupi terrorist paraushtarak i organizuar, dirigjuar dhe financuar nga Beogradi, së cilit i printe Milan Radoiçiq, dështoi në sulmin tinëzar që kishte për qëllim konflikt të armatosur e gjakderdhje (…) dhe mandej aneksimin e veriut të Kosovës”, ka shkruar Kurti.

Kurti ka theksuar se në vendin e sulmit një rrugë mban sot emrin e Afrim Bunjakut, ndërsa ka përmendur edhe personat që janë vrarë gjatë aksionit dhe tre të dënuarit që ndodhen në burg.

“Të gjithë të tjerët do të përgjigjen para drejtësisë në vendin tonë herëdokur. Shteti ynë asnjëherë nuk do të heqë dorë në kërkim të tyre”, ka shkruar ai.

Sulmi në Banjskë ndodhi më 24 shtator 2023, kur një grup i armatosur sulmoi Policinë e Kosovës. Në përleshje u vra rreshteri Afrim Bunjaku, ndërsa tre pjesëtarë të grupit të armatosur u vranë gjatë aksionit.

Në prill të vitit 2026, Gjykata Themelore në Prishtinë dënoi dy të akuzuar me burgim të përjetshëm dhe një tjetër me 30 vjet burgim. Ndërkohë, Milan Radoiçiq dhe dhjetëra të akuzuar të tjerë vazhdojnë të ndodhen në Serbi./Albinfo.ch

---