Kryetarja e FDP-së, Gössi: Refugjatët eritreanë mund të dëbohen

Petra Gössi thotë se nuk pajtohet me qëndrimin sipas të cilit eritreanët nuk mund të dëbohen në vendin e tyre pasi që u kanosen përndjekja dhe torturat

Kryetarja e re e FDP-së, Petra Gössi ka kritikuar praktikën aktuale të azilit dhe ka kërkuar një ndryshim në këtë praktikë. Ajo është shprehur për ashpërsim të kontrolleve në kufij, më shumë dëbime dhe më shumë marrëveshje për kthim me shtetet tjera. Sipas saj edhe azilkërkuesit nga Eritrea parimisht mund të dëbohen nga Zvicra. Natyrisht, duhet shikuar rastet veç e veç.

Ajo nuk pajtohet me qëndrimin sipas të cilit eritreanët nuk mund të dëbohen në vendin e tyre pasi që u kanosen përndjekja dhe torturat. Këtë e ka thënë në një intervistë të botuar të shtunën në gazetën “Basler Zeitung”.

Gössi ka theksuar se vendosja e telave me gjemba në kufij, siç ka kërkuar përgjegjësi për azil në SVP, është e pakuptimtë. Mirëpo, ka shtuar ajo: “Ne me siguri duhet të bëjmë kontrollime më rigoroze në kufij”.

Duke qenë se nga Italia së shpejti pritet ardhja e një numri të rritur të refugjatëve, duhet vepruar sa më shpejt.

Më tutje Gössi kërkon nga ministrja e drejtësisë Simonetta Sommaruga të kujdeset për dëbimin e migrantëve të cilët nuk kanë fituar të drejtë qëndrimi në Zvicër dhe të lidhë marrëveshje pranimdorëzimi edhe me shtete të tjera me të cilat ende nuk ka lidhur.